Mar 3 | TPA | STEP | Mara emosi Yesu i wanavirameei po i rui anivi'emosi numana* auhinenina, ma nahidana rava nimana wanawana ru'umana i inanai i tughutughura.

Mark 3

Yesu, Rava Nimana Wanawana Ru'umana i Viyawahani

(Matthew 12:9-14; Luke 6:6-11)

1 Mara emosi Yesu i wanavirameei po i rui anivi'emosi numana* auhinenina, ma nahidana rava nimana wanawana ru'umana i inanai i tughutughura. 2 Ma rava ghehauhi hi ghohei da Yesu hina viwavui, yamna aubaina hi ina'inana vaimaiha, mepa da viyagohina au maratomna we ravana ina viyawahani. 3 Ma ravana nimana wanawana ru'umana i riwei ipa, “Ma ne'i po rava aunaohi ma mahiri.” 4 Anima rava i raubayadehi ipa, “Metauna raugagayona* i ahi, viyagohina au maratomna: ahi ta dewai bo apo'apoe ta dewai, ta viyawahana bo ta vihiraghena?” Egha hita paribeei ma atapuhi hi genuwana. 5 Anima amona i ghaighai ma i inana viravira babana nuwanuwahi i toghara, ma i vinuwaboya ma i riwa nae ravana nimana wanawana ru'umana auwarina ipa, “Nimam ma rodomi.” Ma nimana i rodomi yana i yawahana. 6 Anima Pharisees* yaghiyaghina'ava hi nae, po guyau Herod ana boru ^{▼▼3:6Guyau Herod ana boru yana (Herodians) Rome* a gabemani i vohagui ma ahi dobu ravahi hi benabenamei ma marina Pharisees* maitehi hi vi'emosi ma ipa Yesu hina vihiragheni. We ravahi yana egha meyanai hitai turana.} marina maitehi hi vi'emosi po Yesu vihiraghenana hi vi'ogatarei.

7 Yesu ma a tauvotagho maitehi hi nae hagahaga au gerahana, ma rava maghamaghauhi Yesu aiwa i dewadewaiya tuyeghana hi nonori po hi ne'i auwarina. Ahi anine'i yana Galilee, Judea, Jerusalem, Idumea ma Jordan tupohi, anima Tyre ma Sidon meyagaihi auririvahi. 9 Rava maghamaghauhi i viyawahanihi ma ghehauhi doridori'ahi yana yohora hi amdudughe'i hipa hita vodadani. Aubaina po a tauvotagho i riwehi po aubaina wam hi nonoghei, babana rava hi magha duma hi garigaribewani. 11 Mepa nana'arena rava aruwa apo'apoehi hi tanitaniwagehi Yesu hi inanai, yana aunaona hi pe'u ma hi ghoreghore hipa, “Tam yana Maimaituwa Natuna!” 12 Ma aruwahi i vigha'ehi da havena rava hita riwehi da tauna aiya'i.

Yesu, Tauvotagho Vinevinehi* 12 i Vinehi

(Matthew 10:1-4; Luke 6:12-16)

13 Yesu i ghae oya autepana ma rava i rauhogharehi, i ghorehi po hi ne'i auwarina. 14 Ma maghauhi 12 i vinehi ma wava i verehi, tauvotagho vinevinehi.* Ma we'i aubaina i vinehi da tauna maitehi ma muriyai ita himira hopunehi rauguguya aubaina, 15 ma vitaniwaga i verehi po aruwa apo'apoehi hina raukaiwenihi. 16 Tauhi 12 ahi wava yana we nana'arena:

Simon (yana Yesu i viwavai po Peter ^{▼▼3:16 ‘Peter’ anona ‘gha'ima’ .}),

Zebedee natunatuna James ma a tevera John i ghorehi po Boanerges (Boanerges anona yana ‘waiparara natunatuna’ ),

Andrew,

Philip,

Bartholomew,

Matthew, ^{▼▼3:18Matthew ana wava ghehauna yana Levi.}

ma Thomas,

James yana Alphaeus natuna,

ma Thaddaeus,

ma Simon yana Zealot ^{▼▼3:18Zealotanona yana ‘rava boruhi Rome* babadahi tauvighaviyehi’ .}

19 ma Judas Iscariot yana Yesu tauvibenabenameina.

Rava Hipa Aruwa Apo'apoena* Yesu ei Taniwagei

(Matthew 12:22-32; Luke 11:14-23, 12:10)

20 Yesu, a tauvotagho maitehi hi naeme au numa, ma wate rava hi riyane'i yana numa hi vihowai po egha emo'emosina hita am. 21 A ghughuni hi nonori aiwa i tuputupuwa ma hipa, “Unu'ununa i neyabayababa!” Aubaina hi ne'i po hita taravaini po hita pa'ini.

22 Mai Judea* ahi raugagayo tauvihanahanapuweina Jerusalemei hi gha'ira'i po Yesu hi deedei hipa, “Beelzebub yana aruwa apo'apoehi ahi bada, Yesu ei taniwagei! Aruwa apo'apoehi ahi bada a kajijirei we aruwahi e raukaiwenihi.”

23 Aubaina Yesu i ghorehi po hi ne'i ma ampariruveruvei i vibabani auwarihi ipa, “Apo menana'arena ma Taumodurere* ina vireta hopunenameei? 24 Inapa dobu ina vi'am kahakaha ma hinai tona vivira, yana na dobuna apo egha ina mahiri. 25 Ma dam ina vi'amkahakaha ma hinai tona vivira, yana apo na damna egha ina ma'ae. 26 Yamna aubaina inapa Taumodurere ana dobu hinai amkahakaha ma hinai tona vivira, yana apegha hina mahiri apo hina pe'u babana ahi mara i kwaha. 27 Apegha meyanai rava kajikajijirana ana numa hina ruini po a purapura hina danenenei. Da aunaona hina raghiraghihi ma muriyai a purapura hina danenenei. 28 Ta'u riwa moinana a ririwemi, rava ahi dewa ma ahi babani, apo'apoehi atapuna apo Maimaituwa ina nuwa'aharei.* 29 Ma aiya ravana Aruwa Vivireina ei jiboghi yana Maimaituwa apegha ina nuwa'aharei, babana na'i yana dewabo'a ma'ema'e vavahaghana i dewai.” ^{▼▼3:28-30Yesu wehidana aiwa e ririweiya yana we ravahi nuwanuwahi i toghara po egha hitai nuwanuwatuhu da hina wanatavirahi. Rava Aruwa Vivireina hei jiboghiya anona yana hipa Yesu tauna egha Maimaituwa a Vinevine,* ma aruwa apo'apoena* itai bagibagi. Ma Aruwa Vivireina ei hegheta da tauna yana Maimaituwa a Vinevine.} 30 Yesu i riwehi babana tauna Aruwa Vivireinei aruwa apo'apoehi i raukaiwenihi ma hi riwei hipa, “Aruwa apo'apoena* tauna ita ruini.”

Yesu a Ghughuni Moinana

(Matthew 12:46-50; Luke 8:19-21)

31 Anima Yesu ayona ma varevarehina hi ghe'eta po numa au mata'etana, hi mahimahiri ma ana riwa hi himiri. 32 Rava maghamaghauhi hi tughura kwaviviroi ma hi ma'ama'ae ma hi riwei hipa, “Ayom, varevarehim ma novunovum yana au dowa hi ghoheghohei po hina inanam.”

33 Yesu i paribeehi ipa, “Aiya ayo'una ma varehi'una?” 34 Anima i inana viravira po rava auririvana hi tughutughura i inanahi ma ipa, “Ona inanai! We ravahi yana ayo'u ma varevarehi'u! 35 Aiya ravana Maimaituwa a rauhoghara e dewadewai yana tauna varehi'u, novu'u ma ayo'u.”